Арыылаах агрооскуолата бэкээринэ арыйда Быйыл Республикабытыгар Предпринимательство сыла биллэриллэн номнуо түмүктэнэн эрэр. Оҕолору агрохайысханнан предпринимательствоҕа сыһыарарга туһулаан үөрэх министерствота сыл ахсын республиканскай бизнес-олимпиада тэрийэн ыытар. 2013 сыллаахха оскуола туйгун үөрэнээччитэ Вика Васильева (салайааччыта - оскуолабыт директора Федорова Т.П.) «Организация пекарни» диэн бырайыагынан ити олимпиадаҕа кыттан I миэстэни ылбыта. Салҕыы бу үлэтинэн регион таһымнаах Чугуновскай ааҕыыларга эмиэ кыайыыны ситиспитэ.
Бу суруйбут бырайыактара быйыл олоххо киирдэ. Сэтинньи 19 күнүгэр Арыылаах нэһилиэгэр оскуолабыт бэйэтэ бэкээринэ арыйан нэһилиэнньэҕэ анаан килиэп оӊоруутун саҕалаата. Биэкэринэн эдэр ыал аҕата Захаров В.М. үлэлиир. Аныгы сүүрээни киллэрэн, оскуола оҕолоро эбии харчыланаары, килиэби дьиэҕэ илдьэн биэрээһин өӊөтүн үөрэ-көтө оӊороллор. Оскуолабыт инники былааныгар агрочаас чэрчитинэн оҕолор нэдиэлэҕэ иккитэ бурдук ас арааһын (пицца, бэрэски, пирог, торт о.д.а.) астаан нэһилиэнньэҕэ атыылыахтара. Өр сылларга бэкээринэтэ суох олорбут буолан, нэһилиэкпит дьоно-сэргэтэ билигин оскуолаҕа махталлара улахан.
Төһө да оскуолата суох үлэлии олордорбут, үлэбит - хамнаспыт тэтимнээхтик барар. Ол курдук, быйыл оскуола эдэр үлэһиттэрэ «СИТИМ» (Союз Интересной, Талантливой, Интеллектуальной Молодежи) диэн ааттаах түмсүү тэриннилэр. Салайааччыннан кэскиллээх, эдэр үлэһит – химия учуутала Тарабукина А.Г. талыллан улэлиир. Оҕолорго, нэһилиэк олохтоохторугар анаан «Ситимнэр» сонун сүүрээни киллэрдилэр. Ол курдук, фитнесс - дьарык (сал. Антонова О.Д.), сувенирдары оӊоруу, иис уонна уус куруһуоктара (сал. В.А., М.В. Яковлевтар) улэлээннэр дьон – сэргэ сэӊээриитин ыллылар. Салҕыы нэһилиэнньэ кыаммат араӊатыгар тимуровскай тахсыылар (сал. Тихонов И.В., Павлова М.И.) оӊоһуллуохтаахтар, оскуола олоҕуттан хаһыат бэчээттэниэхтээх (сал. Печетова Л.С.).
Сонун, саӊа сүүрээннэри сатабыллаахтык олоххо киллэрэн, эдэр үлэһиттэрин бииргэ түмэн нэһилиэнньэҕэ, улууска убаастабылы ылбыт, инникигэ тус көрүүлээх оскуолабыт салайаачытыгар Федорова Татьяна Петровнаҕа махталбыт муӊура суох. Татьяна Петровна айымньылаах үлэтигэр өссө да ситиһиилэри, тус олоҕор дьолу-саргыны, доруобуйаны баҕарабыт.
Татьяна Иванова, Леонид Попов аатынан Арыылаах агрооскуолатын производственнай уерэхтээһиӊӊэ дириэктэри солбуйааччы. Ааптар хаартыскаҕа туһэриитигэр уӊаттан хаӊас тураллар 11 кылаас уерэнээччилэрэ: Вика Васильева, Айта Сидорова, Нюргуяна Пахомова
|